Lazim Destani e priti në takim kryetarin e Komunës së Tetovës, Bilall Kasami

Në zyrën e tij në kompaninë Ecolog në Tetovë dje Lazim Destani e priti për vizitë kryetarin e Komunës së Tetovës, Bilall Kasami. Destani dhe Kasami zhvilluan biseda e diskutuan së bashku mbi mundësitë e bashkëpunimit publiko-privat mes Komunës së Tetovës dhe kompanisë Ecolog. Gjatë këtij takimi temë kryesore ishte ndërtimi i stadiumit të ri të qytetit për të cilin këto ditë kishte dalë dhe leja e ndërtimit. Ata u shprehën të kënaqur që pas një pritje të gjatë më në fund u kryen të gjitha procedurat formale dhe erdhi dita që për këtë projekt të hidhen themelet e të nisë puna për ta bërë Tetovën me stadium të ri e modern.

Kryetari Kasami me këtë rast tha, “Projekti i stadiumit të ri përfaqëson gjithashtu një shembull të qartë të bashkëpunimit të frytshëm midis sektorit publik dhe atij privat, ku falë angazhimit të përbashkët, po i japim jetë një projekti të rëndësishëm që do të shërbejë si simbol i bashkimit dhe progresit të komunitetit tonë”.

Lidhur me këtë takim, Lazim Destani në Facebook shkruan:

Sot këtu në Tetovë, në ambientet e kompanisë Ecolog, e prita për vizitë Kryetarin e Komunës së Tetovës, Bilall Kasami. Në këtë takim, krahas projektit të stadiumit të qytetit, ne diskutuam në përgjithësi mbi mundësitë e bashkëpunimit mes kompanisë sonë dhe Komunës. Për sa i takon stadiumit të Tetovës, unë shpreh kënaqësinë që tashmë kanë përfunduar të gjitha procedurat formale, përfshirë dhe lejen e ndërtimit që është marrë këto ditë.

Jam i lumtur që erdhi momenti i shumëpritur i nisjes së ndërtimit të këtij stadiumi. Uroj punët ndërtimore të këtij projekti të shkojnë mbarë e mirë. Stadiumi i ri i Tetovës, si një vlerë e shtuar për qytetin tonë, është kurorëzim i punës dhe sakrificës së brezit të vjetër tetovar në shërbim të sportit, sport-dashësve dhe në mënyrë të veçantë, në shërbim të brezave të ardhshëm.